SHALAY VS MAANTA: Cahdigii Isbahaysiga Garabyadii UCID & UDUB, Guushii ka dambaysay, Wacad-furka Faysal, Saymaha Siyaasadda taagan iyo halista ku gedaaman Gaashaan-buurta UCID (WARBIXIN+VIDEO)
Hargeysa (GNO)- Guddoomiyaha Xisbiga Mucaaradka ah ee UCID, ayaa buriyey isla markaana ku tuntay heshiis isbahaysi oo dhexmaray garab ka tirsanaa Xisbigii burburay ee UDUB oo uu hoggaaminayey Jamaal Cali Xuseen oo murashax u ahaa xisbigaas burburay, heshiiskaas oo ay aasaas u ahayd in murashaxnimada Xisbiga UCID loo doorto Aqoonyahan Jamaal Cali Xuseen.
Jamaal Cali Xuseen oo bilawgii sannadkii 2012-dii ay 23 xubnood oo Guddiga Fulinta UDUB ka tirsani u doorteen inuu noqdo Musharraxa Madaxweynaha shanta sano ee soo socda ee Xisbigii burburay ee UDUB, taasoo khilaaf ka dhex dhalisay Xisbiga UDUB, sidaa awgeedna wadahadal iyo shirar muddo socday waxay Jamaal Cali Xuseen, Garabka uu hoggaaminayo ee UDUB, in badan oo ka mid ah Masuuliyiinta iyo Taageerayaasha UDUB iyo taageerayaasha gaarka ah ee Jamaal u wareegeen Xisbiga UCID oo xaflad ballaadhan oo lagu shaaciyey midowga garabkooda lagu qabtay magaalada Hargeysa bishii July 12, 2012-dii, iyadoo halkaas lagu kala saxeexday heshiis dhammeystiran.
Qodobbada heshiiskaas ayaa dhigayey in Garabka Jamaal iyo UCID-dii hore awood qaybsi buuxa sameeyaan, isla markaana uu Musharraxa Madaxweynaha noqdo Jamaal, Faysal Cali Waraabe sii ahaado Guddoomiyaha UCID, lana qaban doono shirweyne aan caadi ahayn iyo shirkii golaha dhexe ee UCID, isla markaana la kordhin doono tirada xubnaha golaha dhexe ee UCID.
Qodobbada heshiiska ee gun-dhigga u ahaa midowga labada dhinac, wax aka mid ahaa:-
“1. Labada dhinac waxay isla garteen, in tirada golaha dhexe la balaadhiyo oo la dhigo 251-xubnood. Tiradaas waxa loo kala yeelan doonaa: 100 xubnood oo Xisbiga UCID ah, 100 xubnood oo ay yeelan doonaan garabka cusub ee ka yimid UDUB iyo 51 kayd ahaan doona. Sidoo kale, waxay labada dhinac isla meel dhigeen in dhamaan guddi hoosaadyada iyo xoghayayaasha xisbiga ay si siman u qeybsadaan.
2. Labada dhinac waxay ku heshiiyeen, iyada oo laga duulaayo xeerkii cusbaa ee lagu ansixiyey shirweynihii Xisbiga UCID ee sadexaad, kaas oo dhigayey in la kala saaro guddoomiyaha Guddoomiyaha iyo murashaxa madaxweynanimada ee xisbiga, sidaa daradeed waxa la isla gartey inuu Md. Jamaal Cali Xuseen uu yahay murashaxa rasmiga ah ee Xisbiga UCID uga qeybgalaya doorashada madaxtooyada ee qorsheysan inay qabsoonto sanadkan 2015 Mudane Jamaal, isaga oo la tashanaya guddoomiyaha Xisbiga wuxuu dooran doona murashaxa u tartami doona xilka madaxweyne kuxigeenka.
3. Labada dhinac waxay heshiiskan ku xaqiijinayaan, in hogaanka Xisbiga ee uu hormuudka uu yahay guddoomiye Faysal Cali Xuseen, ee lagu doortey shirweynihii Xisbiga ee sadexaad ay sidooda ahaanayaan. Waxa ku soo kordhaaya hogaanka Xisbiga labada xubnood oo kala ah Xoghayaha guud ee Xsbiga iyo guddoomiye kuxigeenka sadexaad oo ka iman doona garabka cusub ee Jamaal Cali Xuseen.”
Isbahaysigaasi Dhexmaray labada garab iyo murashaxnimadii Xisbiga ee loo asteeyey Jamaal Cali Xuseen iyo Cabdirashiid Xasan Mataan, waxa ay Xisbiga u horseedday Guul salbalaadh ah oo Xisbiga UCID ka saartay Guul-darro iyo burbur uu la deris la ahaa, kaddib markii xisbigaasi ay ka baxeen siyaasiyiin uu hoggaaminayey Cabdiraxman Maxamed Cabdilaahi (Cirro), guddoomiyaha Xisbiga WADDANI.
Waxa kale oo uu isbahaysigaasi iyo murashaxiinta cusub ee xisbiga loo doortay ay sababtay in xisbiga UCID guul lama illaawaan ah ka gaadho doorashadii Golayaasha Deegaanka ee dalka ka qabsoontay sannadkii 2012-kii, taas oo ay ka qayb-qaateen urur-siyaasadeedyo tiro badan oo ay ka soo dhex-baxayeen Saddex Xisbi Qaran, kuwaas oo uu ka mid yahay Xisbiga WADDANI oo beddelay booskii Xisbigii UDUB, halka Xisbiga UCID uu xejistay booskiisii, kuna soo baxay kaalinta saddexaad oo uu markii horeba ka taagnaa jaran-jarrada kala sarreynta saddexda Xisbi Qaran.
Iyadoo ay jiraan heshiiskaas iyo guulahaas xisbigu ka gaadhay saaxadda siyaasadda dalka, ayaa guddoomiyaha Xisbiga UCID Eng Faysal Cali Waraabe la soo baxay damac siyaasadeed uu dhabarka kaga jabinayo murashaxiinta UCID iyo heshiiskii hore loo gaadhay, waxaanu ku hadaaqay weedho xanaf damqasho badan ku ah dhismaha xisbiga iyo murashaxiinta guusha u horseeday, isagoo sheegay inaanu kalsooni ku qabin labada murashax oo aanu dalka ku aamini Karin, hadalkaas oo uu mar-marsiinyo uga dhigtay damaciisa wacad-furka heshiiskii isbahaysi ee UCID iyo Garabkii UDUB ee la midoobay.
HADDABA, waxaanu halkan idiinku soo gudbinaynaa muuqaallo aanu ka diyaarinay meerisyada taariikhdii uu soo maray heshiiskii isbahaysi, Guushii xisbiga UCID ee doorashooyinka kaddib, DAMACA ballan-furka FAYSAL CALI WARAABE, DOODDA Jamaal Cali Xuseen iyo Saymaha siyaasadeed ee laga saadaalin karo Xisbiga UCID iyo Isku-xidhnaanta taageerayaashiisa.
